Temperaturas históricas nun mes de xaneiro en Galicia
As máximas superaron os 20 graos nas catro capitais galegas
Nunca antes se vivira un comezo de ano tan cálido. A temperatura máis alta nun mes de xaneiro na Coruña rexistrárase en 1983. Daquela, superáranse os 21 graos. Hoxe, ás dúas da tarde, o termómetro subiu ata os 23.
As demais capitais galegas rexistraron tamén temperaturas inéditas nesta época do ano. En Pontevedra superáronse os 23 graos, en Ourense os 22 e en Lugo os 21, cifras que, segundo a Axencia Estatal de Meteoroloxía, son as máximas históricas do mes de xaneiro nas tres cidades.
Con temperaturas así, os abrigos podían levarse na man. Esa masa de aire cálido, segundo o prognóstico de Meteogalicia, vaise ir desprazando cara ao leste de Europa e as temperaturas volverán á normalidade dun mes de xaneiro a partir do martes.
