Unha variedade de froitas a 1,29 euros, unha idea para promover o consumo e fomentar a política de cero desperdicio

 "Os nosos clientes eu creo que están encantados da vida", comenta a propietaria da froitería.

"Formidable é isto que puxeron da tarifa plana".

"Pareceume unha obra moi importante", apuntan as súas clientas.

A froita é un deses produtos que nos lembran a inflación que estamos a vivir

 " Uff, amiga, os kiwis a seis euros e pico, hai prezos que non podes chegar", conta unha señora.

"O plátano chegou a superar os catro euros", informa Ana.

Foi por iso que Ana e Castora decidiron poñer en marcha unha campaña de promoción con certos produtos a tarifa plana, aínda que confesan que a idea non foi exactamente delas.

 "Un día estabamos no mercado na Coruña, comprando a froita, coma sempre, e un dos vendedores díxonos, 'veña isto e mais isto e mais isto pois a tanto', non recordo o prezo, e dixo 'veña vai', tarifa plana e entón funlle dando voltas e dixen: ummmm, que boa frase para a nosa froita", conta Ana Gesto, propietaria da froitería.

Con esta campaña promoven o consumo de froitas a un prezo máis económico e a un tempo danlles saída a certos produtos antes de que se estraguen.

"Antes de perdela, obviamente, tarifa plana", insiste a froiteira.

 "Podes levar variado de froita e ademais os prezos son moi accesibles", explica un cliente.

 "Accesible, pero que estea boa, entón choiando moito o mercado, preguntando moitos prezos e incluso regateando", finaliza Ana.