Fortes treboadas no interior de Galicia con retencións no monte do Faro por saraiba
Unha gran saraibada caeu esta tardiña a altura do Monte Faro, na estradra que une Chantada con Rodeiro
O pedrazo acumulouse e provocou importantes retencións. Mesmo houbo que empregar pás para retiralo
A vía de altas prestacións do Monte do Faro que conecta Rodeiro con Chantada rexistrou retencións debido ás tormentas que descargaron gran cantidade de xeo.
Ademais de diferentes vehículos parados pola saraiba, un autobus non puido continuar a marcha.
Debido ao impedimento de seguir o camiño, os condutores afectados comezaron a retirar o xeo con sinais de tráfico para poder continuar.
Despois de conseguir cruzar 200 metros na vía do Faro, os coches xa non se atoparon con máis pedrazo.
Tamén en Ourense cidade, contra as seis da tarde a treboada comezou a descargar con intensidade.
A chuvia caeu con forza, moi intensamente nalgúns momentos, o que provocou diversas incidencias e mesmo que saltaran algúns sumidoiros.
Durante algo máis de media hora os paraugas, para quen tiña a sorte de levalos, non parecían dabondo e moitos tiveron que buscar acubillo.
Pero as treboadas non quedaron só na cidade de Ourense, durante toda a tarde percorreron boa parte da provincia. Na zona leste aínda poderían volver nos vindeiros días.
