Dá unha taxa de alcol sete veces superior á permitida tras un accidente en Lugo

Un condutor implicado nun accidente de circulación no centro urbano da cidade de Lugo deu unha taxa de alcol case sete veces superior á permitida pola lei cando foi sometido á correspondente proba polos axentes da Policía Local que se desprazaron ao lugar do sinistro.

Segundo a información facilitada este xoves pola Policía Local de Lugo, o accidente produciuse ás sete e cuarto da tarde do mércores.

Axentes da Unidade de Atestados acudiron ao lugar do sinistro, na avenida da Infanta Helena, e inmediatamente decatáronse de que un dos condutores implicados presentaba síntomas claros de embriaguez.

Sometérono a unha proba de alcoholemia e deu un resultado de 1,72 miligramos alcol por litro de aire expirado, case sete veces máis do permitido pola lei, que é 0,25.

O condutor foi imputado como investigado por un suposto delito contra a seguridade viaria.