Suspéndense as clases pola neve e prohíbese a circulación de camións en varias zonas de Galicia

A Xunta activará esta medianoite a alerta laranxa por neve e suspenderá as clases e o transporte escolar o venres en toda a provincia de Ourense, as zonas de montaña, sur e centro de Lugo e o interior de Pontevedra, ademais de ampliar a alerta vermella por temporal costeiro a todo o litoral da Coruña e Pontevedra.

A Consellería de Educación enviou unha mensaxe a 62.000 familias e 4.000 profesores para informar sobre a suspensión.  Nunha entrevista a Europa Press, o secretario xeral técnico da consellería, Manuel Vila, explicou que "non é que haxa un risco extremo, que sería a situación vermella, pero si hai unha situación de potencial riscos non ordinarios que levan a que adoptemos esa decisión, insisto, por prevención e precaución".

A Comisión Escolar de Alertas decidiu suspender as clases nos centros educativos e escolas infantís das zonas afectadas, despois dos avisos laranxas (perigo importante) emitidos tanto pola Axencia Estatal de Meteoroloxía (Aemet) como por MeteoGalicia.

As previsións apuntan a que a borrasca Ingrid baixará a cota de neve este venres desde 600 metros ata os 400 ao final do día.

Espéranse xistras e acumulacións de ata cinco centímetros en cotas por encima dos 400 metros e nalgunhas zonas da provincia ourensá poderían chegar aos 20 centímetros.

Máis da metade dos concellos galegos, sen clase

Os concellos afectados polas distintas suspensións pódense consultar no 'Portal Educativo'.

❄️ COMISIÓN ESCOLAR DE ALERTAS

Información para este venres 🗓️

1️⃣ Suspensión das clases e o transporte nas seguintes zonas por neve:

🔹Ourense: toda a provincia
🔹Lugo: Montaña, Sur e Centro
🔹Pontevedra: Interior

Máis info ⤵️https://t.co/869ac0muVB

Atentos a @112Galicia pic.twitter.com/vQldZFB3o1

— EduXunta (@EduXunta) January 22, 2026

 

As clases e o transporte suspéndense nun total de 160 municipios, máis da metade dos 313 da comunidade galega, e son os seguintes:

-Provincia de Ourense: Os 92 concellos

-Provincia de Lugo: 52 concellos en tres zonas:

-27 de Lugo centro: Abadín, Begonte, Castroverde, Cospeito, Guitiriz, Láncara, Meira, Muras, Antas de Ulla, Castro de Rei, O Corgo, Friol, Guntín, Lugo, Monterroso, Outeiro de Rei, Palas de Rei, Paradela, O Páramo, A Pastoriza, Pol, Rábade, Sarria, Xermade, Portomarín, Riotorto, e Vilalba.

- 14 de Lugo Montaña: Baleira, Becerreá, Folgoso do Courel, O Incio, Negueira de Muñiz, Pedrafita do Cebreiro, Samos, Baralla, Cervantes, A Fonsagrada, Navia de Suarna, As Nogais, Ribeira de Piquín e Triacastela.

- 11 de Lugo Sur: Bóveda, Chantada, Pantón, Quiroga, O Saviñao, Taboada, Carballedo, Monforte de Lemos, A Pobra do Brollón, Ribas de Sil e Sober.

-Provincia de Pontevedra: 16 concellos do interior: Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.

Alerta vermella por fenómenos costeiros

Ademais, a Xunta ampliou a alerta vermella (perigo extraordinario) por fenómenos costeiros para o venres a todo o litoral da Coruña e Pontevedra, onde se espera vento de forza 10 e ondas de ata nove metros.

Na Mariña lucense mantense o nivel laranxa, con ventos de forza oito e ondas de ata oito metros.

Debido á alerta costeira, o venres quedarán suspendidas as actividades no exterior dos centros educativos das zonas noroeste, oeste e suroeste da provincia da Coruña, na Mariña e nas zonas das Rías Baixas e Miño en Pontevedra.

Tamén estará suspendida toda a actividade deportiva federada e do programa Xogade tanto en terra como no mar, por ambas as alertas.

Ante a neve, a Xunta recomendou evitar as viaxes por estrada sempre que non sexan necesarios e levar o depósito cheo, así como usar roupa e calzado adecuado, evitar que as persoas maiores saian á rúa e ter á man lanternas e cadeas.

Respecto ao temporal costeiro, pediu á poboación que se manteña afastada da liña de costa, como diques, rompentes e paseos marítimos, ademais de extremar a precaución ao realizar calquera actividade no mar e revisar os cabos e amarres das embarcacións. 

Prohiben a circulación de camións en varias estradas, entre elas a A-52, a AP-53 e a AG53

Ante a previsión de nevaradas intensas, Tráfico prohibiu a circulación de camións desde o día 23 ata novo aviso en: -Toda a A52 en Ourense (desde Rionegro Puente, Zamora, ata Ponteareas).

-Na A6/AP6 E n-6 entre Vilalba e Benavente.

- Na N-541 desde Barbantes (OU) a Cerdedo (PO),

-Na AP-53 desde Vedra a Dozón.

-Na AG53 desde Dozón a Ourense.

- Na N-525 completa.

-Na N-640 de Monterroso á Estrada.

-E na N-120 desde Burgos a Ponteareas (afecta tamén a toda a provincia de Ourense).

Ademais, a Dirección Xeral de Tráfico (DXT) aconsella evitar os desprazamentos por estrada durante a fin de semana na metade noroeste peninsular ante as previsión de nevadas importantes pola entrada da borrasca Ingrid.

Segundo as previsións de AEMET, o máis complicado espérase para o venres pola tarde, con avisos amarelos e laranxas por neve que se prolongarán durante o resto da fin de semana e que afectarán a numerosas provincias do centro e noroeste de España.

Por este motivo, a DXT recomende evitar desprazamentos por estrada, non só nas vías comarcais e locais, senón en autovías e autoestradas.

É máis, estima que máis de 15 vías de alta capacidade poden verse afectadas, entre elas, a AP-71 León- Astorga, A-1 Madrid-Burgos, A-15 Medinaceli-Soria, A-11 Aranda de Douro-A Mallona, A-2 Madrid-Calatayud (Zaragoza), A-6/AP-6 Madrid-Coruña, AP-51 Avila, AP-61 Segovia, AP-53 Vedra-Dozón e AG-53 Dozón-Ourense.

Con carácter preventivo, a DXT restrinxe a circulación de vehículos de mercadorías de máis de 7.500 quilogramos de masa máxima autorizada (MMA) por determinados tramos de estradas. As restricións comezan esta media noite e acordarase a súa duración en función da evolución do temporal. 

A Delegación do Goberno en Galicia activou na súa fase de alerta o Plan Invernal na Rede de Estradas do Estado das catro provincias galegas. Esta medida adóptase ante as predicións emitidas pola Axencia Estatal de Meteoroloxía (AEMET) e irase actualizando en función dos partes meteorolóxicos dos próximos días, xa que é previsible que a situación vaia empeorando conforme avancen as horas.

Dado que as previsións apuntan a un empeoramento da situación, a Delegación activa a fase de alerta no conxunto da comunidade e pide á poboación que consulte as fontes oficiais antes de realizar calquera desprazamento ou actividade no exterior.

Así, a Delegación do Goberno mobiliza todos os recursos dispoñibles en Galicia para neutralizar os efectos que provoquen o frío e a neve nas estradas. 

Para esta campaña, os medios do Ministerio de Transportes e Movilidade Sostible contemplan máis de 450 profesionais, 103 máquinas quitaneves, 20.000 toneladas de sal e máis de 3.257.000 litros de salmoira en Galicia.