Sorteando pedras nas beirarrúas de Poio

Un veciño de 88 anos resultou ferido tras caer polo mal estado dunha beirarrúa en San Salvador de Poio. Non é o primeiro caso, e son moitas as queixas ao respecto.

A xente sortea como pode evitar as trampas de pedra nas rúas de acceso a un centro comercial de San Salvador de Poio. Menos sorte tivo o home de 88 anos que caeu despois de tropezar e sufriu feridas en cara, mans e xeonllo. Salvoulle a vida que no momento de caer á estrada non pasara ningún coche. A xente que percorre a zona recoñece que é complicado camiñar por ela, e mais con andadores e carros de bebé ou da compra.

Nesta zona hai contratempos case todas as semanas. Moitos xa están afeitos e só confian en que a situación mellore, pero multiplícanse os buracos e as baldosas levantadas e rotas. Amais, o paso de peóns carece de rampla de acceso, polo que dificulta a algúns enormemente o paso.

Os veciños esperan que se axilicen as obras de humanización previstas, antes de que o pavimento vaia a peor.