Sofre queimaduras graves cando tentaba apagar un incendio grande en Cuntis

A altura á que quedaron queimadas as árbores de arredor dá idea do tamaño que alcanzaron as lapas no incendio destas moreas de troncos de carballo localizadas en Furco, Cuntis. Todo apunta a que o seu dono estaba a facer leña, e contra a unha da tarde, tras a parada para xantar, na vivenda próxima decatouse do lume e saíu para sufocalo. Tras o aviso ao 112 o equipo de urxencias municipal mobilizou de inmediato os seus medios, o vehículo de primeira intervención e a motobomba:

"Con dúas moreas grandísimas de madeira ardendo e o dono no medio delas intentando apagalas. Retirámolo do medio do lume cando xa tiña a cara bastante queimada, os brazos... e empezamos a intervención pero como cos nosos medios só non podiamos co sinistro, solicitamos a cooperación do GES da Estrada e pedímoslle ao alcalde que solicitara a intervención de Medio Rural porque necesitabamos moita auga para poder controlar iso", explica Miguel Ángel Couto, xefe de Emerxencias e Protección Civil do Concello de Cuntis.

O Concello tamén desprazou unha pa mecánica para mover as toradas e atacalas con auga.

"É leña toda de carballo, ía moito aire e entón por moito que metías auga cando soltabas aquilo aviva ao cen por cento", sinala Couto.

Foi no medio desa situación de lume tan avanzado como encontraron a Jesús, septuaxenario dono da madeira, tentando cunha pequena mangueira afrontar o lume: 

"Foi evacuado en ambulancia e en principio nós cando o sacamos, que lle dixemos que saíra e non quería saír nin quería ambulancia e o sacamos para un lado e xa dixemos que tiña unha queimadura grande na cara e insistía... ata que logo quería falar e xa lle custaba. Sabemos que foi trasladado a Montecelo", di o responsable de Emerxencias do Concello de Cuntis.

Segundo nos dixo a súa muller, este mediodía permanecía na UCI do Hospital de Pontevedra con queimaduras graves. Descoñécese como se orixinou o lume.