Situación preocupante nalgúns encoros da demarcación do Miño-Sil
Situación preocupante nalgúns encoros da demarcación do Miño-Sil
Na conca do Miño-Sil, os seus encoros están a un 52 % de ocupación media
A auga encorada na Camba, en Vilariño de Conso, non chega ao 23 % da capacidade
No Incio, Muíños e O Saviñao están ao 40
Das dúas demarcacións hidrográficas máis importantes que hai en Galicia é a da conca do Miño-Sil a que ten a situación máis preocupante, xa que os seus encoros están a un 52 % de ocupación media
Iso non quere dicir que haxa problemas en todos os encoros. Por exemplo, hainos cunha ocupación superior ao 90 por cento de media, como os dos concellos lugueses de Quiroga ou Carballedo, e outros por riba do 80, coma os de Ourense, Castrelo de Miño, Padrenda ou Nogueira de Ramuín.
En cambio, hainos tamén significativamente baixos. O volume de auga encorada na Camba, en Vilariño de Conso, non chega ao 23 por cento do total que pode ter. No Incio, Muíños e O Saviñao apenas están ao 40.
Concellos como Ribadavia ou Porqueira están con restricións e mesmo estudando como facer novas captacións.
Chaman a atención tamén o anuncio de restricións na conca do Lérez, na comarca de Pontevedra, pertencente á outra gran demarcación, a Galicia-Costa. O concello de Pontevedra pon por primeira vez na súa historia límites á auga da traída, e esta tarde hai unha reunión entre a Xunta e os concellos que se nutren do Lérez para abordar a situación.
Con todo, polo de agora é máis unha medida preventiva e de concienciación cidadá de cara a un escenario peor.
A media de ocupación dos encoros desta demarcación é do 85 por cento.