Simulacro de rescate en altura en Ares
Os equipos de Salvamento practican rescaten en zonas de difícil acceso como os cantís
A busca comezouna Ula, unha cadela de rastrexo á que os seus guías lle facilitaron unha mostra de cheiro de referencia.
"Localizamos un vehículo, facemos unha toma de cheiro na vivenda para os cans de rastrexo. Imos á zona do vehículo e como está sen contaminar facemos un rastrexo ata a zona dos cantís. Alí localizamos á persoa que se precipitou á praia", explica Miguel Montero, Responsable da ONG IAE.
E aí entran os drons da Axega que son os que concretan a localización exacta. A partir de aí é cando os equipos preparan unha vía de acceso. Os rescatadores, canda o persoal sanitario, descenden con cordas ata chegar á vítima.
"Presenta un politrauma importante e os sanitarios recomendan unha evacuación inmediata. E o que facemos é crear un acceso con cordas para un rescatador con padiola e dous enfermeiros especializados en rescate. Pero neste caso, como as lesións non o permiten, colaboramos co Helimer 401", engade Montero.
Proceden a inmobilizala nunha padiola para poder evacuala con seguridade. Para iso pídenlle ao 112 o apoio do helicóptero de Salvamento Marítimo.
"Baixa un rescatador e nós poñémonos ás ordes do helicóptero de Salvamento Marítimo. O que eles nos digan, para dar ese apoio e facer o transvasamento á padiola. Despois realizan un izado ao helicóptero para o seu traslado ao hospital", conclúe o responsable da ONG IAE.
Un exercicio para poñer a proba a capacidade de resposta dos equipos de busca e rescate.