Deteñen seis persoas na Coruña por atracos cunha navalla

Polo momento son poucos os datos que confirma a policía, xa que aínda se está a tomar declaración ás vítimas e polo tanto o atestado continúa aberto. Hai seis persoas detidas como presuntos autores dun delito de roubo con violencia e intimidación.

Os feitos ocorreron na madrugada deste domingo, na avenida de Navarra. Por alí transitaban tres mozos, que de repente se viron rodeados e ameazados por un grupo de asaltantes. A punta de navalla pedíronlles os seus teléfonos móbiles e tamén cartos en efectivo, e despois fuxiron.

Ata lugar desprazáronse varias patrullas da Policía Nacional, e o dispositivo de busca que montaron deu resultado. En rúas próximas conseguiron deter dous dos asaltantes e despois conseguiron localizar tamén os outros catro.

Segundo as primeiras investigacións, os seis poderían formar parte dun grupo que operaba de maneira coordinada a través das redes sociais para cometer os roubos.

As investigacións postas en marcha tratan de saber se este mesmo grupo podería estar implicado en roubos similares cometidos recentemente na cidade.