Seis detidos e dous feridos nunha liorta en Viveiro na que se usou unha motoserra
O suceso rexistrouse contra as 3:00 horas da madrugada, na zona de Cantarrana, en Covas
Un vídeo recolle a lea entre dous grupos de mozos
A Policía Nacional detivo seis persoas nunha liorta en Viveiro na zona de Cantarrana, e durante a que se exhibiu unha motoserra, por un suposto delito de rifa tumultuosa, co emprego de obxectos contundentes. Os axentes interviñeron a un dos implicados a motoserra que levaba.
Dúas persoas feríronse e precisaron traslado ao hospital da Mariña, unha cun corte na cabeza e outra, nun brazo e nas pernas.
O incidente sucedeu pasadas as tres da madrugada, en Covas fronte ao campo de fútbol de cantarrana e un local de ocio nocturno. O Centro de Emerxencias do 112 recibiu chamadas de varias persoas que avisaban da refrega e deu traslado á Policía Nacional e Local, a urxencias sanitarias 061, que desprazou dúas ambulancias de soporte vital básico, e a Garda Civil.
Dous grupos de persoas enfrontáronse a golpes e utilizaron distintos obxectos para causar máis danos. Un vídeo que recolle a lea circulou este domingo nas redes sociais, A Policía Nacional en colaboración coa Local de Viveiro logrou disolver a pelexa e producíronse seis detencións.
Son catro homes e dúas mulleres. As dúas mulleres quedaron en liberdade por entender que non causaron ningunha das lesións, mentres que os catro varóns pasan o luns a disposición xudicial.
