Desarticulada en Ferrol unha rede que usaba patinetes para distribuír cocaína as 24 horas

Axentes da Policía Nacional desartellaron unha organización criminal que distribuía cocaína na comarca de Ferrolterra as 24 horas do día e usaban patinete e vehículos. A intervención, denominada operación Oxford, culminou o pasado mércores, 21 de xaneiro coa detención de seis persoas en Ferrol e Rubí (Barcelona).

A investigación comezou a mediados de 2025 baixo a coordinación do Grupo de Estupefacientes da Comisaría de Ferrol-Narón, contando coa participación da UDYCO de Barcelona.

O operativo arrincou grazas á colaboración cidadá, que alertou sobre a presenza de varios homes distribuíndo estupefacientes no barrio ferrolán do Inferniño.

A rede presentaba unha estrutura organizada e un funcionamento profesionalizado. Así, encargábanse da xestión de pedidos, centralizando a demanda a través dun único teléfono de atención ofrecendo un servizo de 24 horas e as entregas realizábanas mediante repartidores que usaban tanto vehículos particulares como patinetes eléctricos.

Para evitar ser detectados, a banda rotaba aos seus vendedores cada dous ou tres meses, enviándoos de volta a Madrid ou Barcelona tras o seu período de actividade en Ferrol.

A intervención policial permitiu desactivar seis puntos negros de venda polo miúdo na cidade de Ferrol. No transcurso dos rexistros, os axentes incautáronse de máis de 10.000 doses de cocaína de gran pureza, 60.000 euros en metálico, tres vehículos e diverso material para a manipulación e adulteración da droga.

Ademais, na localidade de Rubí, detiveron un dos provedores da organización. Neste rexistro localizouse unha plantación de marihuana onde traballaban tres persoas en situación irregular, que tamén foron arrestadas.

Tras pasar a disposición xudicial, decretouse o ingreso en prisión para un dos seis detidos.