Scepovic: "Todo serán finais. Veño preparado, adestreime co Partizán"
Di que a segunda división é máis forte e competitiva que antes
O serbio Marko Scepovic, novo xogador do Lugo, recoñeceu que lle seduciu a idea de volver á liga, na que xogara co Mallorca na tempada 2014/15, para "axudar o Lugo", penúltimo clasificado na categoría de prata.
"Cando me chegou a oferta preguntei a (Aleksandar) Pantic -co que coincide no Lugo-, e ao meu irmán, que estivo máis anos en España, e gustoume a idea, vir para axudar, marcar goles. Todos xuntos imos ter que ir a todos os partidos coma se fosen unha final", advertiu na súa presentación.
O futbolista, que ten 31 anos, estaba sen equipo desde o pasado verán, cando se desvinculou do Omonia de Chipre, pero nas últimas semanas adestrouse co Partizán de Belgrado, un dos clubs nos que xogou.
"Fisicamente estou moi ben. Estou para o partido, para o que o adestrador decida. Adestrei como catro ou cinco semanas co Partizán e xoguei amigables con eles", asegurou.
Scepovic considerou que a "categoría de prata cambiou" respecto á que el coñeceu no curso 2014/15, no que achegou seis goles ao Mallorca.
"Agora é máis forte e competitiva. Todos poden gañar", explicou.
