Sanidade investiga un gromo de gastroenterite en Narón vinculado a un centro de día e a un evento escolar
Sanidade investiga un gromo de gastroenterite en Narón vinculado a un centro de día e a un evento escolar
A alerta salotu coa notificación de oito casos no centro de día que está xestionado pola empresa DomusVi
A orixe do contaxio parece situarse no menú servido o 3 de marzo
O Pazo da Cultura foi onde se celebrou o evento escolar, unhas xornadas do Club de Debate Alingua
A Consellería de Sanidade iniciou unha investigación epidemiolóxica tras confirmarse un brote de gastroenterite de orixe alimentaria no municipio de Narón.
A alerta saltou tras a notificación de oito casos iniciais no centro de día xestionado pola empresa DomusVi, cuxa cociña elaborou e serviu a comida, nas instalacións do Centro Comunitario Manuela Pérez Sequeiros, para un evento escolar celebrado esta semana no Pazo da Cultura, situado nas súas inmediacións.
Sanidade constituíu de forma inmediata un equipo de investigación de brotes, integrado por especialistas en epidemioloxía e veterinarios inspectores de saúde pública.
Segundo as primeiras pescudas, a orixe do contaxio parece situarse no menú servido o pasado martes, 3 de marzo. Os afectados presentan un cadro clínico de diarrea leve e de curta duración.
O equipo técnico traballa agora no cruzamento de datos dos asistentes e na análise das mostras de alimentos para determinar con exactitude se se trata dunha contaminación bacteriana ou dun proceso vírico compatible coa sintomatoloxía.
Pola súa banda, o Concello de Narón emitiu un comunicado oficial aclarando que non foi o organizador do xantar servido durante as xornadas do Club de Debate Alingua. O consistorio precisou que esta actividade está promovida pola Asociación de Entidades pola Lingua Galega e xestionada integramente por unha empresa externa encargada da loxística dos debates.
O Concello, que se mantén en contacto permanente co Centro Comunitario Manuela Pérez Sequeiros, detallou os centros educativos que participaron na xornada do martes e que poderían verse afectados, como son os naroneses de IES As Telleiras e IES Terra de Trasancos, e os ferroláns de Canido e Saturnino Montojo.
O goberno local insiste en que todas as actividades de xestión municipal cumpren escrupulosamente cos protocolos de seguridade sanitaria e mostraron a súa total disposición para colaborar con Sanidade no esclarecemento dos feitos.
