Sanidade estima que a folga de médicos acabará cuns 70.000 procedementos suspendidos
Nos dous primeiros días canceláronse 490 cirurxías, 13.700 consultas hospitalarias, 11.900 consultas de Atención Primaria e 1.355 probas diagnósticas
Na quenda de mañá deste xoves o seguimento é do 21,70 %
A ministra asegura que chegou case ao límite das súas competencias no estatuto marco
Protesta de médicos diante do CHUS, en Santiago de Compostela (Europa Press)
A Consellería de Sanidade estima que a folga de catro días que están a realizar os médicos esta semana contra o estatuto marco do Ministerio de Sanidade cancelará preto de 70.000 procedementos nos centros sanitarios da comunidade.
A cifra foi avanzada este xoves, terceiro día do paro, polo conselleiro do ramo, Antonio Gómez Caamaño, que sinalou que aínda non teñen unha previsión de canto tempo tardarán en recuperar a actividade asistencial cancelada, pero non será "un mes".
Nos dous primeiros días de paralización suspendéronse 490 cirurxías, 13.700 consultas hospitalarias, 11.900 consultas de Atención Primaria e 1.355 probas diagnósticas.
A terceira xornada de folga está sendo secundada polo 21,70 % dos médicos, segundo o Sergas
O impacto da folga desde o punto de vista asistencial, o que "máis preocupa" a Xunta, foi semellante nas dúas primeiras xornadas, aínda que un pouco maior na segunda.
Caamaño avanzou que na quenda de mañá deste xoves, terceiro día de folga, o seguimento está a ser do 21,70 % (o mércores foi do 21,25 %).
O apoio dos médicos foi máis alto nos grandes hospitais, un 27,53 %, e en Atención Primaria situouse no 6,67 %, segundo o Goberno galego.
"Estamos a conseguir manter os hospitais máis ou menos nunha situación de tensión leve, moderada, mantendo as prioridades", dixo o conselleiro.
En canto á vez que se tardará en recuperar, Caamaño sinalou que aínda non teñen estimación, pero lembrou que é unha época complicada polo Nadal e hai "xente con días de libre disposición e vacacións pendentes".
"Hai que ver cantos recursos temos para solucionar este problema", insistiu.
A ministra de Sanidade, Mónica García, tiña prevista hoxe unha reunión con representantes sindicais, e en Sanidade esperan que sirva para "avanzar" na resolución do conflito.
Mónica García di que chegou case ao límite das súas competencias no estatuto marco
A ministra de Sanidade, Mónica García, asegurou este xoves que chegou "case ao límite" nas melloras no estatuto marco que regula as condicións laborais dos médicos, con propostas como reducir a duración das gardas ou acabar coa inestabilidade laboral.
Nunha entrevista en Antena 3 antes da reunión entre Sanidade e a Confederación Española de Sindicatos Médicos (CESM) e o Sindicato Médico Andaluz (SMA), convocantes da folga prevista ata este venres, García afirmou que demostrou ter "capacidade de diálogo" e expresou a súa empatía coas "frustracións" do colectivo.
A ministra remarcou non obstante que hai "frustracións baseadas en competencias" que non son súas, senón das comunidades autónomas.
A ministra reiterou que gran parte das solucións a este "malestar e frustración" polos "malos tratos que os acompañan durante anos" están plasmadas -no que depende das competencias estatais- no borrador do estatuto marco presentado.
Entre estas melloras, que espera que non se deixen fóra, lembrou o compromiso de reducir as gardas de 24 a 17 horas ou acabar coas interinidades de 10 anos (ela mesma foi 8 anos interina, lembrou), con convocatorias obrigatorias de oposicións cada dous anos.
Melloras das que non se pode excluír o resto do colectivo sanitario, advertiu, polo que remarcou que non se pode asumir que haxa un estatuto propio dos médicos fóra do que inclúe o resto dos profesionais sanitarios. "Non podemos asumir un estatuto marco propio, e tampouco as comunidades autónomas nin os partidos políticos", subliñou.
