Samuel xa puido falar coa súa muller, que vive en Ghana

 "Onte el tivo a oportunidade de chamar a súa muller e si que para ela foi algo grande porque unha cousa é que che digan que está ben e outra é que poidas escoitar a voz da persoa", informa Julio Torres, pastor da Igrexa evanxélica de Marín.

Días de angustia para a súa muller e os seus fillos. Son unha parte da familia numerosa que Samuel ten en Ghana. Onte recibiron con moita ilusión e alivio a chamada. E aliviados tamén en Marín porque alí ten a outra familia, a que formou dentro da comunidade evanxélica onde foi bautizado.

 "Samuel é unha persoa que a queremos moito, el é moi alegre, moi pronto para botar unha man a todo cando hai que traballar, non é un irmán na carne pero é un irmán na fe", conta Lola Lagos, membro da Igrexa evanxélica.

"A cea de Nadal, de Noiteboa pasouna cunha das familias da igrexa, era alguén disposto a axudar, a colaborar cun sorriso permanente", apunta o pastor.

A Igrexa evanxélica loce crespón negro. Dende que se coñeceu a noticia do naufraxio, rezar foi o único consolo.

"Aí estivemos clamando ao Señor para que el fora un dos vivos, e foi, o Señor librouno do mar", exclama Lola.