Rueda urxe unha reunión con Sánchez coas conexións ferroviarias como tema central do encontro

O presidente da Xunta en funcións, Alfonso Rueda, avanzou este xoves que unha vez tome posesión do cargo vai solicitarlle unha reunión a Pedro Sánchez para falar dos compromisos pendentes do Goberno central en Galicia. Rueda anunciou que un dos temas centrais dese encontro na Moncloa serán as infraestruturas ferroviarias.

O Consello da Xunta en funcións analizou un informe sobre o grao de execución das infraestruturas e servizos de tren compormetidos. Rueda dixo que o balance dese documento é "preocupante" e que por iso esta materia será prioritaria na súa reunión con Pedro Sánchez.

Entre as materias pendentes que marca ese informe, o presidente da Xunta en funcións destacou a falta de investimentos no Corredor Atlántico de Mercadorías, que non haxa un cronograma sobre o AVE Vigo-O Porto ou seguir á espera dos trens Avril. Rueda reclamaralle tamén ao presidente do Goberno melloras no AVE Madrid-Galicia e a modernización das liñas Ferrol-A Coruña, A Coruña-Monforte ou Ferrol-Ribadeo.