Rueda di que o Goberno galego fixo nos orzamentos un "esforzo importante" pola provincia de Lugo

O presidente do PPdeG, Alfonso Rueda, asegurou este domingo que o Goberno da Xunta fixo este ano nos orzamentos un "esforzo importante e especial" pola provincia de Lugo e avogou por seguilo facendo.

Todo iso co obxectivo de "acabar as infraestruturas que están empezadas, atender sectores fundamentais como o campo e o mar ou prestar servizos sociais". Así o manifestou ante os máis de 700 asistentes á tradicional polbada de San Froilán organizada polo PP da provincia de Lugo, acompañado da presidenta provincial e portavoz local, Elena Candia.

Entre outros investimentos, Rueda destacou o plan de choque dotado con 90 millóns de euros para "reducir a lista de espera na valoración da dependencia", e lamentou que o Goberno central "queira paralizar este avance e recorrera ante o Tribunal Constitucional a nova regulación autonómica".

"Sánchez non é capaz de aprobar uns orzamentos, pero si de estar pendente de criticar que sexamos rápidos nas valoracións, algo que a xente nos pide", sinalou; e afirmou que "fronte a isto, non hai outra receita que seguir unidos".

Neste contexto, acusou o líder do PSOE galego, José Ramón Gómez Besteiro, de "non contar a verdade en ningún sitio" e subliñou que este "estivo a dicir que Lugo era a provincia peor tratada nos orzamentos, pero dixo o mesmo de Ourense, A Coruña e Pontevedra".

Sobre a posibilidade dunha convocatoria de eleccións xerais, instou os presentes para estar "preparados" e "unidos" para "estar fortes como partido" e "para darlle todo o impulso a quen ten que cambiar todo o que está a pasar en España: Alberto Núñez Feijóo".

"Poderémolo conseguir se contamos con Lugo, a provincia que sempre lle dá ao Partido Popular os mellores resultados de España. Hai que dicirlles aos que prefiren comer chistorras que aquí en Lugo teñen moi pouco sitio para pasalo ben", ironizou o líder dos populares galegos, que enxalzou o "equipazo" do PP provincial.

Por último, loou tamén a líder provincial, Elena Candia, e a conselleira do Medio Rural, María José Gómez, e os profesionais polo seu traballo durante os incendios deste verán. Con todo, Candia asegurou que os populares "demostraron ser a forza política que ten capacidade para chegar a acordos" e tamén que "sabe xestionar, resolvendo problemas e liderando proxectos".