Rueda di que haberá sancións se se incumpren os servizos mínimos na folga de buses

O presidente da Xunta, Alfonso Rueda, urxiu este martes a alcanzar un acordo "canto antes" para poñer fin á folga de autobuses na provincia da Coruña, e insistiu en que haberá sancións se non se cumpren os servizos mínimos.

"Os servizos mínimos hai que cumprilos; se non se cumpren, ten que haber sancións", dixo en declaracións a xornalistas á marxe dun acto en Santiago de Compostela, para o que pediu "responsabilidade" aos convocadores dos paros, unha acción reivindicativa que podería converterse en indefinida o próximo febreiro.

Rueda lamentou que as consecuencias do conflito páganas os usuarios dos autobuses, que cada vez teñen "maior demanda e maior utilización", polo que instou a patronal e os sindicatos para alcanzar un acordo xa que se trata dun "servizo público fundamental".

A Xunta "é a primeira interesada en que se resolva" o conflito, asegurou o presidente, que lembrou que o Consello Galego de Relacións Laborais "está aí para mediar".

"Estaremos vixiantes e cumprindo as nosas funcións, pero as dúas partes, que son empresa e traballadores, deberían chegar a un acordo canto antes", reiterou.

A provincia da Coruña vive este martes a súa novena xornada de folga de autobuses desde principios de decembro, que se repetirá este venres e baleirou as estacións.

Os convocadores denuncian a falta dun convenio colectivo actualizado e reclaman subidas salariais para recuperar o poder adquisitivo perdido, unha mellor organización para evitar quendas excesivas e facilidade para a conciliación laboral e familiar, entre outras medidas.