O Grao de Medicina estará descentralizado o próximo curso

O próximo curso a Facultade de Medicina de Galicia xa estará descentralizada. Tras máis de medio ano de negociacións entre a Xunta e as tres universidades públicas, o pacto para a descentralización da docencia clínica de Medicina recibiu luz verde e este martes escenificouse cun acto formal co que se constitúe a comisión de seguimento para avaliar os pasos para dar neste proceso de fronte ao próximo curso 2026-2027.

Tras a ratificación do acordo a través da firma entre os conselleiros de Educación, Ciencia, Universidades e FP, Román Rodríguez; e Sanidade, Antonio Gómez Caamaño, ademais dos tres reitores -Antonio López da USC, Ricardo Cao da UDC e Manuel Reigosa da UVigo- na Cidade da Cultura de Santiago, a comisión de seguimento tomou a decisión de crear dous grupos de traballo para facilitar as tarefas para a descentralización.

Segundo informou Rodríguez, un dos grupos de traballo centrarase "nos aspectos técnicos e xurídicos", concretamente na regulación das unidades docentes que deberán crearse nas universidades da Coruña e Vigo; mentres que o segundo grupo de traballo "terá un carácter económico", coa tarefa de estimar as necesidades humanas e materiais, é dicir o custo económico que supoñerá a descentralización do Grao de Medicina. 

A comisión de seguimento, en que participarán alumnos, velará polo cumprimento do acordo

O titular de Educación sinalou que o acordo ao que se chegou no seu momento entre a Xunta e as tres universidades agora debe desenvolverse "mediante unha folla de ruta" e polo seu cumprimento velará a comisión de seguimento, á que se incorporarán ata tres representantes do alumnado (un por cada universidade).

"Quero facer unha chamada de agradecemento a todos aqueles que tiveron un papel preponderante no traballo que se fixo ata chegar aquí. Agora comezamos unha nova pantalla", declarou Rodríguez, que apelou á responsabilidade e a obrigación de desenvolver e sobre todo "concretar" aqueles eixos principais que se fixaron no documento de acordo.

Durante o acto, o titular de Sanidade asegurou que este pacto supón un "fito para a historia de Galicia, das universidades galegas e da Facultade de Medicina" e agregou que os estudantes van ter á súa disposición "os mellores recursos" en Galicia para a súa formación.

Desde a USC, o reitor Antonio López sinalou que hoxe é un día de "satisfacción" tras máis de seis meses de "arduo traballo" para lograr "o reto máis grande" que tivo a universidade para tratar de buscar "unha solución acoutada" para o futuro dos médicos que están por chegar.

"Trátase de manter unha facultade, pero incorporar á mesma todas as capacidades tanto do sistema sanitario galego como as que achegan o resto de universidades para a mellor formación dos alumnos", resumiu.

Desde a UDC, Ricardo Cao, tamén abundou en cualificar o acordo como "positivo" para o sistema, a través de "un convenio a cinco partes que permitirá mellorar a calidade formativa"; mentres que o reitor da UVigo, Manuel Reigosa, asegurou que agora "se abre un novo camiño", que será excelente para o sistema universitario galego.

Composición do comité

A comisión de seguimento está formada, ademais de polos conselleiros de Educación e Sanidade e os reitores das tres universidades, polo secretario xeral de Universidades, José Alberto Díez; e o director do Sergas, José Ramón Parada.

En representación de cada un dos hospitais universitarios están Andrés Soto Varela polo Complexo Hospitalario Universitario de Santiago de Compostela, Carlos Vázquez Varro polo Complexo Hospitalario Universitario da Coruña e Ana Concheiro Guisán polo Complexo Hospitalario Universitario de Vigo.

Tamén forman parte da comisión os actuais vicerreitores de Titulacións: Moisés Canle pola UDC e Alfonso Lago pola UVigo; mentres que no caso da USC acudiu o vicerreitor de Profesorado, Ernesto González, dado que a Vicerreitoría de Graos atópase actualmente vacante polas eleccións ao reitorado.

A composición complétana o decano da Facultade de Medicina e Odontoloxía da USC, José Martín Carreira, e o decano da Facultade de Ciencias da Saúde da UDC, Iván de Rosende; ademais dos tres alumnos que se incorporarán.

O acordo alcanzado establece unha descentralización progresiva nos últimos tres anos nas tres universidades públicas galegas, cunha duración de catro cursos académicos.

Para iso, crearanse unidades docentes nos complexos hospitalarios universitarios da Coruña e Vigo, que acollerán cada unha ao 25 % do alumnado matriculado no curso descentralizado correspondente, así como ao profesorado.

Ademais, o 50 % da nova contratación de profesorado asignarase ás universidades da Coruña e Vigo.