A Xunta asina cos sindicatos, agás a CIG, a rebaixa de ratios da ESO e Bacharelato

A Xunta e os sindicatos CCOO, ANPE, UXT e CSIF asinaron este xoves o acordo para reducir de forma progresiva os ratios de alumnado en Educación Secundaria Obrigatoria (ESO) e Bacharelato.

Trátase dunha medida que completará a extensión desta mellora a todas as etapas educativas e situará a Galicia "por baixo dos máximos establecidos na normativa estatal", segundo sinalou o conselleiro de Educación, Ciencia, Universidades e Formación Profesional, Román Rodríguez.

Por parte dos sindicatos, asinou en San Caetano o acordo Ero Sante (CCOO), Julio Trashorras (ANPE), Cristóbal Salgueiro (UXT) e Rosa Silva (CSIF); mentres que a CIG non participou.

Segundo o acordo, o cociente máximo na ESO reducirase dos 30 alumnos por aula previstos con carácter xeral en España a 25 en Galicia a partir de setembro de 2028. En Bacharelato, o límite será de 30 estudantes fronte aos 35 fixados na normativa estatal, unha cifra que en Galicia xa se sitúa actualmente en 33.

Rodríguez enmarcou este acordo na "folla de ruta" iniciada en 2023 entre a Xunta e as organizacións sindicais e defendeu que o Executivo autonómico está "a cumprir os seus compromisos".

"En 2023 asinamos un acordo con tres dos catro sindicatos que integran a mesa sectorial. Posteriormente incorporouse un cuarto sindicato, de modo que contamos cunha folla de ruta perfectamente organizada e planificada, na que fomos dando, de forma sucesiva e progresiva, distintos pasos e adoptando diferentes medidas", declarou.

Para o conselleiro, trátase de "un paso máis" dentro dun proceso de mellora que "terá un impacto directo na calidade do ensino. "Reducir os cocientes, con menos alumnos por aula, permitirá ofrecer unha mellor atención. Creo que iso é evidente", expresou.

Desta forma, o próximo setembro culminará a redución da cociente de 25 a 20 alumnos en toda a etapa de Educación Infantil, mentres que o curso seguinte comezará o mesmo proceso en Primaria.

En setembro de 2028 iniciarase a aplicación da redución na ESO e posteriormente en Bacharelato.

En declaracións á prensa, Rodríguez contrapuxo esta medida á política educativa do Goberno central, ao que acusou de presentar "grandes titulares" sen adoptar "medidas reais".

Tamén criticou a posición da CIG, ao considerar que se opón a un acordo que, segundo dixo, incorpora "medidas tremendamente positivas para a organización e a mellora do sistema educativo".

"Cando hai diálogo e negociación conséguense resultados que melloran o sistema educativo", concluíu.