Rueda confirma que en Galicia non hai ningún caso de varíola do mono
O presidente da Xunta asegura que xa están descartados os tres primeiros casos sospeitosos que se analizaron
Rueda: "Están en período de análise outros dous casos sospeitosos de ser varíola do mono"
O presidente da Xunta Alfonso Rueda asegurou este venres que “a día de hoxe non hai ningún caso” de varíola do mono “confirmado en Galicia”.
En declaracións á prensa tras participar nun acto en Santiago, o presidente galego explicou que aínda que se estudaron “tres primeiros sospeitosos”, as análises realizadas xa descartaron que se tratase desta enfermidade.
Estes tres primeiros casos xa están “descartados”, polo que “non hai ningún caso confirmado”. Con todo, agora estanse estudando outros “dous” novos casos que están en “período de análise” pero “sen confirmar nin nun sentido nin no outro”.
O Ministerio de Sanidade confirmou este venres 98 casos de vexigas do mono en España
O Ministerio de Sanidade confirmou este venres 98 casos de vexigas do mono en España, 14 casos máis que os notificados o día anterior polo laboratorio do Centro Nacional de Microbioloxía (CNM) do Instituto de Saúde Carlos III (ISCIII).
O CNM recibiu ata agora 200 mostras pertencentes a casos sospeitosos de monkeypox ou varíola do mono, 43 novas sospeitas en 24 horas.
Descartáronse xa 102 mostras tras dar negativo para a varíola humana e para outros orthopoxvirus; no último día foron 29 as mostras descartadas.
Nas últimas 24 horas a Conselleria de Saúde da Generalitat confirmou os catro primeiros casos de varíola do mono en Cataluña; mentres, a Comunidade de Madrid anunciaba o primeiro caso de varíola do mono ou varíola símica nunha muller. A Comunidade de Madrid segue sendo a que notificou máis casos en todo o territorio español. Este xoves informaba de que xa son 65 os casos confirmados de varíola do mono, mentres que outros 30 permanecen en investigación á espera de resultados.
