Róubanlle máis de 3.000 euros a unha centenaria de Ribadeo
Os ladróns meteron a anciá nun coche e colléronlle os cartos e mais as xoias que levaba
Unha veciña de Ribadeo, de cen anos de idade, foi vítima do roubo de máis de 3.000 euros. Tras saír da súa vivenda, no barrio de Cabanela, a centenaria fixo o seu percorrido habitual ata a rúa Vilalba. Alí abordárona dúas mulleres e un home, que a convenceron para que subise a un coche familiar de cor marrón.
Segundo o relato da vítima, ofrecéronlle repartir con ela unha importante cantidade de cartos que atoparan, gañando así 5.000 euros. Só facía falta comprobar que os billetes non eran falsos, polo que a anciá volveu á casa para levarlles un sobre con 3.000 euros. Daquela subtraéronlle esa contía, xunto coas xoias de ouro que levaba e os 60 euros que tiña na carteira, e finalmente abandonárona á entrada da vila.
Coa axuda das gravacións das cámaras da Policía Local, a Garda Civil investiga agora a autoría destes feitos. Pola súa parte, a familia da vítima pide a colaboración cidadá para identificar quen lle roubou os seus aforros a unha muller centenaria.
