Rouban en Lugo un camión cargado con oito toneladas de cable de cobre
O vehículo foi localizado nun monte, estaba baleiro e non se sabe nada da mercadoría, valorada en 20.000 euros
Todo quedou rexistrado nas cámaras de seguridade da empresa
Xa caera a noite cando unha furgoneta aparcou diante dunha empresa de maquinaria de Lugo, dela baixaron tres persoas e empezaron a forzar a cancela, todo quedou gravado nas imaxes das cámaras de seguridade.
"Saltan o valado, entran nas instalacións, collen unha máquina rompen a cancela e sacan o camión", explica Natalia López, propietaria da empresa.
O vehículo estaba cargado de cable de cobre, unhas 8 toneladas Horas máis tarde aparecía nun monte próximo, atopouno un veciño que paseaba cos cans. Estaba baleiro e nada se sabe da mercadoría
"Tiveron toda a noite para desfacerse do cobre, había rodeiras de camións, furgonetas", engade Natalia.
Nesta empresa cren que o roubo estaba planeado e que levaban días vixiándoos.
"Tíñano planeado e estiveron vixiándonos e espero que a policía dea con eles", di a propietaria da empresa.
O cobre ou ouro vermello é un dos artigos máis cobizados polos amigos do alleo.
"Pois uns 20.000 euros aos que hai que sumarlle os gastos da cancela que serán outros 7.000", di Natalia López.
Veciños e empresarios piden máis vixilancia policial na zona, porque non é a primeira vez que sofren unha vaga de roubos.
