Rouban e causan desfeitas no colexio San Tomé de Cambados

A Garda Civil investiga un roubo no colexio público San Tomé de Cambados. Os ladróns accederon ao centro a través dunha cristaleira que conecta cun cuarto de contadores situado debaixo das escaleiras.

Unha vez dentro, rebuscaron en diferentes dependencias, como a conserxería, o estudio de radio e varias aulas.

Os asaltantes levaron cinco ordenadores portátiles e diverso material escolar, aínda que o que máis lamentan no centro son os danos provocados durante o roubo. O valor total entre o material subtraído e os desperfectos ascende a uns 4.000 euros.

Segundo as primeiras investigacións, os ladróns actuaron sen planificación. Ao parecer, fuxiron ao activarse a alarma do colexio, deixando parte do botín polo camiño, incluídas grampadoras e fundas de portátiles.

Varios veciños conseguiron gravar os sospeitosos saíndo do colexio, e a Garda Civil está a analizar tamén vídeos difundidos en redes sociais ese mesmo día, nos que algúns mozos se gababan de entrar no centro educativo.

Tamén apareceron pintadas tanto no colexio como no pavillón de deportes próximo, o que reforza as sospeitas sobre a implicación dun grupo de menores da vila.

Na comunidade aumentan cada vez máis as voces que piden instalar cámaras de seguridade. Din que sería a única forma de garantir un uso correcto das instalacións públicas.