Rodríguez Uribes: "Vigo e Valencia deben ser sedes do Mundial 2030"
Tamén defende a candidatura de Madrid e o estadio Santiago Bernabéu como sede para a final do torneo
José Manuel Rodríguez Uribes, presidente do Consello Superior de Deportes (CSD), considera que "Vigo e Valencia deben ser sedes do Mundial 2030", que organiza España xunto a Marrocos e Portugal, e defende a candidatura de Madrid e o estadio Santiago Bernabéu como sede para a final do torneo.
Durante unha entrevista concedida á Axencia EFE, o titular do organismo tamén pon de relevo a importancia da seguridade cidadá como un dos desafíos máis relevantes da organización do Mundial que tamén terá a Uruguai, Arxentina e Paraguai como sedes dos partidos inaugurais das súas respectivas seleccións, en homenaxe ao Mundial de 1930, disputado en Montevideo.
Despois da primeira reunión da Comisión Interministerial para a preparación e organización do Mundial 2030, celebrada o 15 de xullo na sede do Consello Superior de Deportes (CSD), Rodríguez Uribes defende que España debe manter unha "formulación de máximos" nas sedes.
Aínda que a FIFA fixou para España 11 sedes, o directivo deixa claro que a cifra non é definitiva e que aínda hai marxe para adaptarse ás circunstancias.
"En principio, a idea era que houbese 20 sedes. É verdade que iso non está pechado. Terminarao pechando FIFA? Se son 20, se son 22, dependerá tamén de como estean os estadios máis adiante, cando se achegue o Mundial", explicou.
