Riazor agarda a mellor entrada da temporada diante do Málaga

Volverá quedar Riazor escondido entre o fume das bengalas. A afección fai un chamamento para recibir o equipo. Non quedan entradas para o partido deste sábado diante do Málaga. Por primeira vez na temporada pode superarse a barreira dos vinteseis mil seareiros. 

Ata o de agora o teito está no partido da segunda xornada cando o campo rexistrou unha afluencia de 25.860 espectadores diante do Burgos. Contra o Spórting (25.089) e a Cultural Leonesa tamén houbo grandes entradas (25.078). Eran os mellores momentos do Deportivo no campionato. Cifras que non conseguiu nin no partido contra o Rácing de Santander. Diante do Córdoba, o pasado martes, rexistrouse a segunda maior afluencia con 25.632 seareiros.

O apoio da afección permitiulle sumar os dous últimos triunfos como local, algo que se estaba resistindo nas últimas xornadas e recuperar o posto de ascenso directo. Con tres citas en menos de sete días Hidalgo tivo que dosificar os esforzos dos xogadores. Só Alvaro, Alti e Barcia completaron os noventa minutos nos dous encontros. Houbo cinco trocos entre o equipo titular do Sporting e o do Córdoba. E Riazor agarda por Yeremay, ao que o adestrador só lle concedeu a última media hora contra Sporting e Córdoba.

De aquí ata o final quedan dous enfrontamentos contra rivais directos. O do Málaga ten recendo a partido grande. O outro dos equipos da zona alta que visitará Riazor será a Unión Deportiva As Palmas.