O Supremo advirte de sanción a Bolaños e Albares se en cinco días non remiten a lista dos afectados pola lei de netos

O Tribunal Supremo reclamoulles aos ministros da Presidencia, Xustiza e Relacións coas Cortes, Félix Bolaños, e ao ministro de Asuntos Exteriores, José Manuel Albares, que remitan antes do 28 de outubro a relación nominal das 163.020 persoas afectadas pola aplicación da Lei de Netos, con apercibimento de multa ou dedución de testemuño. 

En concreto, a Sala do Contencioso Administrativo require aos ministros que remitan ao Supremo, á Xunta Electoral Central e á Oficina do Censo Electoral, a relación nominal das 163.020 persoas afectadas pola suspensión do dereito a voto de estranxeiros rexistrados no Centro de Residentes Ausentes (CERA).

E advírtelles de que se ás 15 horas do día 28 non enviaron esa información, a Sala poderá acordar unha multa coercitiva ou deducir, no seu caso, o oportuno testemuño de particulares para esixir a responsabilidade penal que puidese corresponder.

"Esta relación nominal que, incomprensiblemente para esta Sala, non foi facilitada aínda, é fundamental para a correcta conformación do censo electoral de referencia, pois só dese modo responde os principios de transparencia e obxectividade do proceso electoral", di a Sala, que sinala que tan só 91 persoas acreditaron o seu exilio de 31.390 expedientes revisados desde o pasado 10 de setembro cando se acordou a medida cautelar. 

Bolaños garante que o TS terá en prazo a lista de afectados por suspensión de voto 

O ministro daPresidencia, Xustiza e Relacións coas Cortes, Félix Bolaños, asegurou este venres na Coruña que o Tribunal Supremo terá a lista de afectados por suspensión de voto en prazo.

En declaracións á prensa na marxe dun acto no que participou na cidade, indicou que o seu departamento traballou desde as primeiras decisións do TS "facendo todo o humanamente posible para dar cumprimento aos requirimentos" e que o seu Ministerio achegou toda a documentación, todos os nomes, toda a información dispoñible no rexistro civil dixitalizado o pasado día 15 á Oficina do Censo Electoral, o mesmo día que se reclamou.

Sobre Asuntos Exteriores, manifestou que lle consta que xa houbo instrucións claras a todos os consulados nesa mesma data, que agora se van reiterar para cumprir nun "tempo récord" a pesar de ser un traballo "manual" e moi laborioso. Pero "encantados" de facelo e de cumprir co prazo, afondou.