Retrásase ao 7 de xullo a constitución das corporacións do partido xudicial de Noia
Afecta os concellos de Boiro, A Pobra do Caramiñal, Ribeira, Porto do Son, Muros, Outes, Lousame, Noia e Mazaricos
A xunta electoral de Noia obrigou a aprazar ao 7 de xullo a constitución das novas corporacións dos concellos de Boiro, Lousame, Mazaricos, Muros, Noia, Outes, A Pobra do Caramiñal, Porto do Son e Ribeira.
A xunta electoral desestima un recurso presentado polo PSOE. O representante socialista na zona denunciou que lles impedían comprobar os 900 votos nulos, a pesar de que os socialistas quedaron a só dez votos de obter un deputado provincial por este partido xudicial.
Aínda que a xunta electoral desestima a denuncia dos socialistas, dá un prazo para presentar recursos que fai que se teña que aprazar ata o 7 de xullo a constitución destas corporacións.
Na tarde deste xoves a decisión xa foi recibida polos concellos.
