Israel planea concentrar a toda a poboación gazatí nunha "cidade humanitaria" en Rafah

O ministro de Defensa israelí, Israel Katz, anunciou este luns, nunha rolda de prensa ofrecida só para medios locais, que deu instrucións ao Exército para que prepare un plan para establecer unha nova "cidade humanitaria" nas ruínas da urbe de Rafah, no extremo sur da Franxa de Gaza, onde pretende concentrar a toda a poboación gazatí.

Segundo Katz, esta nova zona humanitaria albergaría inicialmente a uns 600.000 palestinos que malviven na zona costeira de Mawasi próxima a Rafah, á que foron chegando nestes meses tras ser desprazados forzosamente polo Exército doutros puntos do enclave.

O obxectivo de Israel é que toda a poboación gazatí (pouco máis de dous millóns) quede concentrada neste punto, aínda que o ministro de Defensa volveu alentar aos palestinos para "emigrar voluntariamente" a outros países, tal e como propuxo o presidente dos Estados Unidos, Donald Trump no principio do ano.

Aqueles palestinos que accedan a esta nova "cidade humanitaria", tras pasar un control de seguridade no que Israel examinará se son "axentes de Hamas", xa non poderán saír dela, advertiu Katz.

O anuncio do ministro chega mentres está previsto que durante esta madrugada o primeiro ministro israelí, Benjamín Netanyahu, e o seu homólogo Donald Trump aborden a proposta de cesamento do fogo en Washington que, de momento, contempla 60 días de tregua durante os cales se realizarán intercambios de reféns por presos palestinos.

Neste sentido, o titular israelí de Defensa dixo que, se as condicións o permiten, a construción desta nova "cidade" comezaría durante o cesamento do fogo, que paralelamente tamén se está discutindo en Doha en conversacións indirectas entre os mediadores.