Resucitan en Allariz unha burra supostamente morta en Zamora
Resucitan en Allariz unha burra supostamente morta en Zamora
Atopárona moribunda nas areeiras da Limia
Polo microchip souberon que a deran por morta hai 3 anos en Zamora
O seu nome de rexistro é Moni, pero en Allariz rebautizárona como Trinidad: "Trinidad, porque necesitou a graza do Pai, do Fillo e do Espírito Santo para volver nacer", explica David Lema, responsable de benestar animal da asociación Andrea, que se fixo cargo do animal.
Chegou á asociación hai tres meses, cando un agricultor a atopou, abandonada e desnutrida, nas areeiras da Limia.
"Estamos falando de anos maltratada porque ten rotada a terceira falanxe das dúas mans: case lle sae a punta do óso pola sola", asegura David.
Apareceu en Sandiás, pero este concello, como a maioría, non dispón de medios para facerse cargo destes animais e así acabou na protectora de burros de Allariz. Puxérona a tratamento de inmediato: ferraduras ortopédicas, unha dieta especial e moito cariño. "Agora camiña, camiña bastante, pasa moito tempo de pé, que antes sempre estaba tombada. E de ánimo está moi activa, moi cariñosa", explica David.
Microchip
O animal ten chip. Grazas a el, souberon que o seu dono, un gandeiro de Zamora, rexistrou a súa morte en 2018. Pero quedan moitas incógnitas por despexar.
"A primeira: como é posible que a recollida de cadáveres e a administración non verifiquen a morte do animal. A segunda: como se traslada o animal ata Ourense desde Zamora", sinala David.
A cuestión está agora en mans da Administración de Castela e León, pero o futuro de Trinidad non corre perigo. A asociación vai seguir facéndose cargo dela.