Respiro para o Arousa logo do triunfo diante do Ceares

Seis xornadas sen gañar levaba o Arousa que rachou a serie cun triunfo imprescindible diante do Ceares. O pechacancelas saiu durmido ao terreo da Lomba. Aos tres minutos marcou Luismi e nada máis sacar do centro do campo Julio Rey recuperou e marcou o segundo gol.

Houbo momentos de dúbida, propios da tensión e da responsabilidade. Non gañar tería sido letal. O autogol de Orviz puxo a tranquilidade e malia que o Ceares recurtou diferenzas xa non perigou unha vitoria que saca ao Arousa do descenso. A vindeira fin de semana tocaralle outro partido dramático no campo do Salamanca.