Recuperan o corpo dun home falecido dentro dun lagar en Monterrei

Os servizos de emerxencia recuperaron este domingo á noite un home falecido no interior dun lagar en Monterrei. O home estaba facendo viño na parroquia de Flariz, no lugar de Sandín.

O aviso chegou ao 112Galicia ás 21:50 horas, a través do persoal do Servizo de Urxencias Sanitarias de Galicia-061, que informaba de que os veciños levaban aproximadamente unha hora sen ter noticias do home.

Manuel é quen atopou o corpo sen vida do seu veciño. Acudiu ao lagar contra á noitiña, alertado pola nai da vítima, que se preocupou ao ver que tardaba moito en regresar.

"Fun á adega, abrín a porta, que estaba pechada, e xa vin os zapatos enriba dunha táboa. Mirei cara o lagar e xa o vin tumbado". "Chamaron o 061 pero non había nada que facer. Xa estaba morto", di Manuel.

Entre el e outro veciño aínda intentaron reanimalo, pero non foi posible.

"O lagar non tiña moito mosto e el estaba boca arriba, daba a sensación de que intentaba respirar. Mireille o pulso e aínda intentamos reanimalo, pero...", explica Manuel.

Ata o lugar desprazáronse os bombeiros de Verín e fixeron medicións. A concentración de osíxeno no aire era só dun dez por cento, unha porcentaxe incompatible coa vida. "E iso coa porta aberta". "Vanlle facer a autopsia para ver se foi do osíxeno ou de que lle dera algo ao corazón ou á cabeza. Iso é o que queren aclarar", comentan Manuel e a súa muller.

Traballo perigoso

Na zona andan todos cos mesmos traballos estes días. A vendima adiantouse este ano e boa parte da uva está xa nos lagares. Os veciños son conscientes dos riscos que implica remexer a uva durante a fermentación porque non é a primeira vez que ocorre unha desgraza.

"Eu fíxeno moitas veces. Hai veces que parece que te chama para abaixo". "É moi perigoso se non ventilas. Como se metes e a boca no tubo de escape dun coche". "Hai que estar previdos, con ventilación. E normalmente non debía estar unha persoa soa", explican dous veciños.

Así e todo, están pendentes do resultado da autopsia para confirmar se esa foi a causa da morte.