Publicador de contidos

Publicador de contidos

Rescatan un ancián tras días ferido na súa casa en Lugo

Rescatan un ancián tras días ferido na súa casa en Lugo

O home, de 82 anos, sufrira unha caída e quedara inmóbil, polo que foi ingresado no HULA

Félix Aragunde 11/11/2022 13:54

Un home de 82 anos tivo que ser rescatado tras caer na súa propia casa, no barrio lugués da Milagrosa, onde permaneceu inmóbil durante días. O ancián sufriu varias fracturas, polo que nin sequera podía erguerse para pedir axuda.

Tampouco para abrir a porta, que foi o que alertou a asistenta que o vai atender a diario e que avisou a policía. Unha vez acudiron varias patrullas e mais os bombeiros, os axentes atoparon o octoxenario deitado, nun estado moi preocupante.

Manuel Arias, voceiro da comisaría de Lugo: "Non se deu localizado ningún familiar nin ningún paradoiro, polo que se chamou os bombeiros para franquear a entrada. Xa na vivenda, comprobouse que o home estaba na cama cunha forte dor no costado, froito dunha caída, sen comer, sen beber e sen poder moverse, e déuselle asistencia ata a chegada do 061".

Dáse a circunstancia de que na mesma vivenda xa sufrira un suceso similar outro ancián. Daquela fora unha veciña a que alertara a policía, que recomenda non agardar demasiados días para dar aviso.

Manuel Arias, voceiro da comisaría de Lugo: "Por desgraza, é habitual. Esta vez, que se fixo máis mediático, serve para pedir que nos chamen cando boten en falta un veciño. Sempre é mellor acudir en 24 ou 48 horas, que non nunha semana e que poida aparecer finado".

Tras ser trasladado a Urxencias nunha ambulancia, o octoxenario permanece ingresado no HULA.

Publicidade
Publicidade
Publicidade
Publicidade