Rescatan catro tripulantes dun veleiro cun incendio na ría de Vigo

Un incendio declarado nun veleiro nas proximidades do Museo do Mar de Vigo en Bouzas obrigou á intervención dos servizos de emerxencia para socorrer os tripulantes.

Unha das persoas que ía a bordo da embarcación de 30 pés contactou co 112 pasado o mediodía do domingo para comunicar a incidencia na central de emerxencias e pedir axuda.

Ata o barco desprazouse unha lancha con socorristas municipais do concello de Cangas que auxiliaron as catro persoas. Rexeitaron asistencia médica porque se encontraban ben, e as lapas foron apagadas.