Rescatan unha anciá do incendio da súa vivenda en San Xoán de Río
A muller e a súa coidadora non se decataran do lume e foron os veciños os que a axudaron
As lapas deixaron moi danada a casa que fora rehabilitada hai un par de anos
Alberto Izquierdo é bombeiro en Madrid pero está a pasar uns días en Mouruás. Foi o primeiro en decatarse do incendio e alertar os veciños. Pasaban das doce do mediodía. A súa intervención foi crucial para evitar consecuencias maiores. No interior da vivenda estaban, nese intre, unha muller de 93 e a súa coidadora, pero ningunha das dúas se dera conta do fume.
Sospeitan que o incendio podería ter a súa orixe na cheminea. A estrutura de madeira complicou os traballos de extinción nos que tamén participaron o GES de Castro Caldelas e Protección Civil de San Xoán de Río.
A vivenda, que fora rehabilitada hai un par de anos, quedou inhabitable. Ardeu a cuberta e sufriu danos importantes o primeiro andar e o baixo. Nela vivía a anciá cun fillo. O concello ofreceulles aloxamento mentres solucionan os trámites co seguro, pero por agora atópanse cuns veciños.
