A sensibilidade e o respecto pola natureza do Culler de Pau, recoñecidos por Repsol cun Sol Sostible
A sensibilidade e o respecto pola natureza do Culler de Pau, recoñecidos por Repsol cun Sol Sostible
Javier Olleros di que o respecto a natureza nace do propia contorna do restaurante
A cociña do Culler de Pau prepara alimentos da súa horta e de produtores de proximidade
O restaurante Culler de Pau do Grove é o novo gañador do premio Sol Sostible Alimentos de España. A decisión deuse a coñecer este luns na localidade alacantina de Elx. Un recoñecemento que sitúa a cociña de Javier Olleros na vangarda do coidado da natureza.
Esta distinción da Guía Repsol e Alimentos de España premia cada ano os catro restaurantes máis comprometidos co medio natural. Á cabeza de todos, o galego Culler de Pau, o singular proxecto do cociñeiro Javier Olleros, coa súa aposta pola redución de desperdicios, a eficiencia enerxética e o produto de proximidade.
Desde a aldea de Reboredo, no Grove, Olleros entra en diálogo co entorno e experimenta con novos sabores na súa propia horta ecolóxica. Di que se trata dunha cuestión de sensibilidade e responsabilidade coa natureza e invita á que o mundo da cociña pase á acción porque queda moito camiño por percorrer.
Xa ten tres soles Repsol e, desde hoxe, o premio á sostibilidade. "Estando nun contexto de natureza, nas Rías Baixas, rodeado de hortas, cunha ría de fronte. Esta paisaxe púxonos este punto de partida para ser responsables e estar comprometidos coas boas prácticas e pensando no futuro, que é do que se trata, pensar nos demais", di Javier Olleros.
Na cociña do Culler de Pau hai alimentos da horta e de produtores da zona, e entre as súas prácticas está aproveitar ao máximo a materia prima.
"Non se tira nada. O allo porro aprovéitase desde a parte verde ata a parte máis tenra, iso é o bonito da cociña", explica.
En opinión de Javier Olleros a alta cociña pode servir de escaparate a un reto ao que se ten que sumar toda a sociedade.
