Renfe lanza este luns os novos abonos de Media Distancia con descontos de ata o 50 %

Renfe habilitará o vindeiro luns, 23 de xuño, a venda dos novos abonos mensuais de 20 euros para toda a rede de proximidade e Rodalies de España, así como os novos abonos mensuais de Media Distancia con ata un 50 % de desconto e os bonos de 10 viaxes, tamén en Media Distancia, cun 40 % de desconto.

Os abonos mensuais de Media Distancia, válidos sempre nun mesmo traxecto cunha orixe e destino definidos, terán un 50 % de desconto para os mozos de ata 26 anos e do 40 % para o resto, mentres que os menores de 14 anos viaxarán gratis.

Con este abono mensual poderase viaxar de forma ilimitada no traxecto para o cal se comprou o abono durante todo un mes, comezando a contar o período como moi tarde 10 días despois da súa compra, que se poderá realizar só en despachos de billetes e máquinas autovenda.

Respecto ao bono de 10 viaxes, o desconto será do 40 % para todos (menos os menores de ata 14 anos, que non pagarán por ningún transporte público), será válido durante un ano desde a data de compra e será multipersoal, é dicir, poderá usalo máis dunha persoa.

En canto aos trens de proximidade, a principal novidade é o abono mensual de 20 euros, que permitirá viaxar de forma ilimitada en todos os núcleos de proximidade do país durante un mes. Pódese comprar desde 10 días antes ao seu primeiro uso. Para mozos de ata 26 anos o prezo será de 10 euros ao mes.

A rede de proximidade tamén terá un bono de 10 viaxes, sen desconto neste caso e cun prezo que varía segundo o número de zonas polas que se viaxe dentro de cada núcleo, cun período de validez dun ano e multipersoal.

Os abonos Avant seguirán como ata o de agora, con descontos do 50 %, e os abonos dos núcleos de proximidade de Asturias e Cantabria continuará sendo gratis, debido á polémica do deseño de trens e o seu atraso da posta en operación nesas rexións.

Este novo esquema de billetes e descontos pon fin aos últimos anos de gratuidade en Media Distancia e Cercanías, e anteceden ao futuro abono único para todo o transporte público en España, que previsiblemente se poñerá en marcha a partir de xaneiro do ano que vén.

No transporte público autonómico e local, os descontos dos abonos mensuais e títulos multiviaxe pasarán do 50 % ao 40 % desde xullo ata decembro, pagado o 20 % polo Estado e o outro 20 % pola comunidade ou o concello en cuestión, menos en Castela e León, que terá que asumir o pago de todos os descontos que aprobe a Junta ao non pedir as subvencións ao Goberno.