Recuperan unha vivenda ocupada ilegalmente en Lalín

Os ocupantes ilegais do segundo andar dun inmoble de Lalín abandonárono voluntariamente tras dous meses de ocupación. Porén, aos propietarios quédalles por diante traballo dabondo para axeitar a vivenda, xa que cando entraron nela atoparon un panorama lamentable.

"Horrible. Desastrosamente. Un cheiro tremendo, non se daba entrado. Estiveron dous ou tres cans aí durante dous meses e todos os excrementos polo chan. Había que mirar onde poñías o pé. Estaba todo polo chan. Unha calamidade, vaia, para chorar", conta a propietaria da casa.

A toda esta sucidade hai que engadir os estragos nas paredes e no mobiliario. Os danos materiais, di o don, son cuantiosos. Os propietarios, agora, están pendentes da avaliación do seguro.

"Todo polo chan. As portas mordidas polos cans, a porta da entrada rebentada, as vaixelas rotas, cristalería, roupa da cama tirada polo chan... feito todo un desastre", di a dona do piso.

Precisamente, este mércores un dos rapaces que ocuparon a vivenda estaba citado nun xulgado de Lalín por un presunto delito de usurpación. Declarou que entrara na vivenda porque non tiña onde vivir.