A Garda Civil investiga a morte dun home de 79 anos que faleceu nun accidente marítimo, en Redondela
A Garda Civil investiga a morte dun home de 79 anos que faleceu nun accidente marítimo, en Redondela
Unha testemuña relatou que a embarcación navegaba en círculo e que un home estaba pedindo axuda desde a auga
Os servizos de emerxencia recuperaron o cadáver dun tripulante dunha embarcación que chocou contra unha batea en Redondela este luns.
Foi un particular quen contactou co 112 Galicia minutos antes das 18:00 horas para pedir axuda tras ver como unha embarcación deportiva estaba batendo contra as bateas no peirao de Chapela, en Redondela.
Segundo fontes da Garda Civil, unha testemuña relatou que a embarcación navegaba en círculo e que un home estaba pedindo axuda desde a auga, entre as plataformas en que se crían bivalvos, ata que deixou de escoitalo.
Tras ser localizado o corpo sen vida do tripulante polo helicóptero do Servizo de Gardacostas de Galicia, o equipo acuático da Garda Civil recuperouno ás 18:47 e trasladouno ao peirao de Chapela, en Redondela.
Ademais dos Gardacostas e da Garda Civil, deuse aviso a Salvamento Marítimo, á Policía Nacional e Local, aos profesionais do grupo acuático dos Bombeiros do Baixo Miño e aos efectivos da Agrupación de Voluntarios de Protección Civil da localidade pontevedresa.
Tamén foron informados o persoal do Servizo de Urxencias Sanitarias de Galicia-061 e a Autoridade Portuaria de Vigo, que xa tiñan constancia do suceso.
A autopsia apunta a un afogamento do home de 79 anos.
