Recomendan unha revisión visual para o comezo do curso escolar

Os optometristas calculan que o 30 % dos casos de fracaso escolar ten algo que ver con problemas de saúde visual non detectados, de aí a importancia de realizar revisións anuais como parte das rutinas da volta ao cole.

Desde o Colexio de Ópticos-Optometristas de Galicia insisten: "É moi infrecuente que os nenos pequenos se queixen de que ven mal, porque sempre viron así, por iso ten que ser un problema moi grave para que avisen", explica Alexander Dubra, da xunta directiva do colexio.

Hai, con todo, sinais de alarma que convén ter en conta para axilizar a consulta cun profesional:

► Torcer a cabeza ao ler

► Tapar un ollo cunha man ou co pelo.

► Entrepechar os ollos

► Achegarse demasiado ao libro ou á pantalla.

► Dor de cabeza, picor ou avermellamento dos ollos.

► Dificultade para ler.

Mención á parte merece o incremento de casos de miopía na infancia, directamente relacionado co excesivo uso das pantallas. Reducir ese uso é o primeiro consello dos ópticos, pero tamén utilizar os dispositivos en determinadas condicións:

► Luz natural ou acesa, nunca ás escuras.

► Apagar as pantallas 45 minutos antes de durmir.

► Cada media hora levantar a ollada da pantalla e relaxar a visión.

O Consello Xeral de Ópticos Optometristas asegura que un terzo dos nenos ten problemas de visión relacionados coa exposición aos dispositivos electrónicos.