Queixas en Galicia pola dificultade da proba de bioloxía na PAU
Os alumnos expresaron o seu malestar en redes sociais cualificando unha pregunta de "imposible" e "desproporcionada"
O profesorado considera que o exame é complicado para o nivel de bacharelato
A proba deste ano de bioloxía nos exames de acceso á universidade (PAU) en Galicia xerou malestar entre estudantes e profesores desta área pola esixencia da mesma.
Tanto en persoa como a través de redes sociais expresouse o reproche á dificultade da proba. "Pois nada, aquí o alcanzable exame de bioloxía", dicía un dos comentarios difundidos por redes sociais para precisar, ademais, que "a metade do contido non está no temario".
"Toda amargada despois do exame de bioloxía da PAU", relataba outra das persoas que fixo a proba.
Parte do exame de Bioloxía da PAU 2025 en Galicia (CIUG)
De "imposible", "desproporcionada" ou do nivel dunha oposición, tacharon en concreto a seguinte pregunta: "Algúns virus, como o da gripe, teñen unha alta taxa de mutacións, o que fai que, moitas veces, as vacinas dun ano non sexan eficaces o seguinte. Como pode facilitar a utilización de ARNm a creación de vacinas novas, adaptadas ás mutacións producidas?"
As redes sociais enchéronse de comentarios con críticas a este tipo de pregunta, incluídos tamén profesores. "É un exame bastante complicado para nivel de segundo de bacharelato", expuxo a Europa Press un profesor, para quen había "preguntas nada claras e algo complicadas".
