Queda en liberdade o suposto autor do atropelo mortal en Cee
Como medidas, a xuíza impúxolle a obrigación de comparecer os días 1 e 15 de cada mes, a privación do permiso de conducir ata que finalice o procedemento e a retención do pasaporte
A xuíza do Tribunal de Instancia de Corcubión, praza número 2, acordou a posta en liberdade do suposto autor dun atropelo mortal en Cee ao non solicitar prisión a Fiscalía. O home, detido o martes pola Garda Civil, pasou a disposición xudicial este mércores, investigado por tres supostos delitos: un de homicidio por imprudencia, outro de abandono do lugar do accidente e un último contra a seguridade viaria ao perder a vixencia do permiso de condución pola retirada de todos os puntos.
A xuíza acordou a posta en liberdade do detido debido a que o fiscal non solicitou o seu ingreso en prisión, polo que non é posible decretalo. Como medidas, impúxolle a obrigación de comparecer os días 1 e 15 de cada mes, a privación do permiso de conducir ata que finalice o procedemento e a retención do pasaporte.
O sinistro produciuse este luns pola noite na avenida de Fisterra de Cee, a AC-445, que une a localidade con Corcubión, onde quedou o cadáver do falecido e o suposto autor fuxiu.
