Pustovyi volve "á súa casa" para abrir unha nova etapa na historia do club

Artem Pustovyi chegou por primeira vez a Compostela con 23 anos, onde pasou unha "peregrinación" no que creceu como xogador ata recalar nun grande como o Barça.

Agora, o xigante regresa a casa aos seus 31 anos e o Monbus Obradoiro presentou ao ucraíno no Pazo de Raxoi, cita á que non faltaron Moncho Fernández, técnico do club, Eduardo Pascual, director deportivo, Rafael Silva, conselleiro da entidade, e Pilar Lueiro, concelleira de deportes.

O ucraíno, antes de atender aos medios de comunicación, ofreceu as súas primeiras palabras na súa volta a Santiago:

"Quero empezar a dicir, como o fixen moitos anos atrás cando tiven a primeira presentación, que estou feliz de estar aquí. Estou feliz de volver á miña casa. Vivín tres anos moi doces aquí. Na miña mente están as mellores cousas que pasei. Coñezo a xente que traballa neste club e como funciona. Estou feliz. Agora continuamos traballando e temos grandes obxectivos este ano que trataremos de cumprir".

Sobre se lle custou dicirlle que si á oferta dos santiagueses, admitiu que “sempre é fácil”.

“Cada ano pensei no Obradoiro, porque son un obradoirista. Sempre os seguín e sempre me alegrei cando gañaron. Este ano tamén xogaremos a clasificatoria da Basketball Champions League e é unha boa oportunidade para o club de ir a unha nova etapa na súa historia".

Tamén destacou a importancia que tivo o corpo técnico no seu regreso á entidade compostelá.