Prisión para un detido en Vigo en relación cun punto venda de drogas
Incautáronse 30 gramos de heroína, 42 gramos de haxix, 2 gramos de cocaína, mil euros en efectivo e diferentes útiles empregados para a súa elaboración
A Policía Nacional desarticulou un punto de venda e cociñado de droga na contorna da rúa Aragón, en Vigo, durante un operativo que rematou coa detención dunha persoa como presunta autor dun delito de tráfico de drogas polo que ingresa en prisión provisional.
A intervención, segundo informou este venres a Policía Nacional, levouse a cabo este xoves ao mediodía, momento en que os investigadores executaron a entrada e rexistro autorizados xudicialmente no inmoble.
Durante o rexistro, os axentes localizaron diversas cantidades de droga distribuídas en varios puntos da vivenda, así como material destinado á súa manipulación e preparación, como recipientes, instrumentos de quecemento, elementos para o corte e outros obxectos utilizados habitualmente para a elaboración de dose.
En concreto comisáronse 30 gramos de heroína, 42 gramos de haxix, 2 gramos de cocaína, mil euros en efectivo e diferentes útiles empregados para o cociñado.
A actuación culminou coa detención dunha persoa por un presunto delito de tráfico de drogas, que foi trasladada a dependencias policiais para a práctica das dilixencias oportunas.
A praza 2 de instrución do Tribunal de Instancia de Vigo determinou para el prisión provisional, comunicada e sen fianza, investigado por un delito contra a saúde pública, segundo informou o Tribunal Superior de Xustiza de Galicia.
