Róubanlle a unha muller en Pontevedra todas as xoias herdadas de varias xeracións

Quedoulle o xoieiro limpo. Leváronlle o seu pequeno gran tesouro.

"Eran, sobre todo, herdanzas e agasallos da miña avoa, da miña tataravoa á miña nai e despois a min. Tamén tiña os pendentes da pedida que eran moi bos, pulseiras de ouro ríxidas que xa non existen. Había pezas moi, moi bonitas", relata a vítima.

Bonitas e caras. Nunca as taxaran pero sumarían varios ceros, unha gran perda económica e máis aínda sentimental.

"Enorme, enorme! De feito, había un anel que me regalara a miña avoa pola Comunión, cunha perla natural, de ouro con brillantes e é unha peza que non existe porque o deseñara ela que lle encantaba deseñar xoias", engade.

Pasaran a fin de semana fóra e á volta a escena foi desoladora. 

"A porta estaba forzada e medio aberta, con sinais dunha panca metálica e facendo presión arrancaron a metade do marco, que quedou colgando da pechadura e atopamos o piso completamente revolto", lamenta a muller.

Pouco máis tiveron que romper.

"Por recomendación de amigos aos que os roubaran antes, dicían que o van atopar igualmente e que para evitar estragos maiores, non é bo agochalo todo demasiado porque che poden ata rasgar os colchóns, como lles pasou a eles", explica.

O modus operandi axústase ao habitual nas bandas do leste. Marcan as portas cun plástico e entran nas que comproban que non caeu ao chan, que non houbo movemento. A policía ten no radar bandas de xeorxianos, albaneses e tamén de mulleres croatas. Nos mesmos días, levaron xoias doutra vivenda de Pontevedra e houbo roubos similares na zona de Vigo e en dúas casas de Vilagarcía. 

A investigación está avanzada pero, de momento, sen froitos. 

"Deséxolles sorte porque me encantaría recuperalas". 

Dío con poucas esperanzas pero por pedir que non quede.