Rouban un quilómetro de cable de cobre nun paseo peonil do concello de Rois
O Concello interpuxo denuncia e pide mais vixilancia policial
Sen luz nos farois e con todas as arquetas levantadas. Así amencía este venres unha senda peonil do concello de Rois.
"Seguramente viñeron pola noite con roupa escura e abrens as arquetas, cortan cable e tiran", explica Isaac Eiras, operario de montaxes eléctricos.
O botín que levaron, un quilómetro de cables de cobre. Algúns teñen máis recheo que outros, pero non foron selectivos e cortaron a eito.
"Neste caso interesan todos, teñan mais ou menos cobre, porque é un material que se paga ben".
Os operarios afanábanse esta mañá en volver conectar a iluminación do paseo, habilitado hai dous anos para comunicar o lugar de Seira coa rotonda da estrada de Padrón.
"Paréceme unha burrada o que fixeron. A ver se o arranxan pronto e non volven máis", di un viandante.
E se lles dá por regresar a roubar máis cobre, non o terán tan fácil.
"Despois de conectar todo, imos meter area e selar con cemento, para que non o teñan fácil se volven. Pero pouco máis se pode facer".
O Concello de Rois denunciou os feitos ante a Garda Civil de Padrón, pedindo de paso máis presenza policial para evitar novos roubos na zona.
