A presenza de drons obriga a pechar o tráfico durante horas en aeroportos de Copenhague e Oslo

Os aeroportos de Copenhague e de Oslo permaneceron pechados ao tráfico durante varias horas a noite do luns e durante esta madrugada debido á presenza de varios drons na súa proximidade.

O aeroporto de Kastrup, na capital danesa, suspendeu as súas operacións entre as 20.30 de onte e a 0:30 hora local de hoxe o que provocou de momento unhas 100 cancelacións de voos, mentres outros 31 foron desviados a aeródromos próximos.

O de Gardermoen (Oslo) permaneceu pechado entre as 0:30 e as 3.30 deste martes, hora local. 

"O modo de operar, o seu tamaño e o tempo sobre o obxectivo fixeron que concluamos que probablemente haxa un actor capacitado detrás do uso dos drons", dixo hoxe en conferencia de prensa o inspector Jens Jespersen, da policía de Copenhague.

Jespersen aclarou que a expresión "actor capacitado" alude a "un actor que ten as ferramentas para mostrarse" e que quen manexou os drons poderían exercitarse previamente.

"Non podo dicir nada respecto diso, simplemente non o sei", afirmou Jespersen ao ser preguntado por unha posible participación rusa.

Os servizos de intelixencia daneses e noruegueses colaboran na investigación, pero nada indica de momento que haxa unha conexión entre ambos os incidentes.

A policía danesa informou de que se trata de varios drons de gran tamaño procedentes de varias direccións, que voaron seguindo un patrón sobre o aeroporto e que non parece que o seu obxectivo fose provocar danos ou situacións de perigo.

No caso de Gardermoen, a suspensión do tráfico aéreo obrigou a cancelar unha ducia de voos.

Dous cidadáns estranxeiros foran detidos horas antes por facer voar drons no centro de Oslo, malia que aínda non se determinou se hai algunha relación co episodio en Gardermoen.