O Goberno aproba este martes o decreto-lei que reforza o embargo de armas a Israel
A aprobación chega dúas semanas despois do paquete de medidas anunciadas por Sánchez contra Israel pola súa ofensiva en Gaza
O presidente do Goberno reclama a entrada de Palestina na ONU e chama a parar o xenocidio en Gaza
A voceira do Goberno Pilar Aledría, tas o último consello de ministros (EFE / Sergio Pérez)
O Consello de Ministros aproba este martes o decreto-lei que consolidará xuridicamente o embargo de armas a Israel dúas semanas despois de que o presidente do Goberno Pedro Sánchez anunciase esta medida dentro dun paquete de nove iniciativas encamiñadas a contestar os ataques de Israel contra Gaza.
As demais medidas contra Israel aprobáronse na reunión do Gabinete do 9 de setembro, pero quedou pendente o decreto debido, segundo fontes da Moncloa, á complexidade técnica que esixía a súa aprobación, con varios ministerios implicados e obrigados a adecuar o seu contido á lexislación europea.
Iso si, o Executivo deixou claro que o embargo de armamento está en marcha desde 2023, aínda que agora se pretende afianzar de modo que se consiga unha maior cobertura xurídica á prohibición de comerciar armamento con Israel. As demais medidas acordadas tamén estaban vixentes con anterioridade.
O decreto-lei entrará en vigor pero deberá ser validado polo Congreso nun prazo máximo de trinta días para contar desde o da súa promulgación, é dicir, que unha vez que se debata deberá contar co voto favorable da maioría da Cámara, algo para o que en principio o Goberno conta con suficiente apoio.
Cabe a posibilidade de que, unha vez validado, o pleno acorde a súa tramitación como proxecto de lei, o cal permite introducir emendas no texto procedente do Goberno.
Neste sentido, a vicepresidenta segunda e líder de sumar no Executivo, Yolanda Díaz, advertiu de que se o decreto non é suficientemente ambicioso o seu grupo podería votar a favor da tramitación como proxecto de lei para así cambialo.
Pedro Sánchez non presidirá este martes a reunión do Gabinete, xa que está en Nova York con motivo da celebración da Asemblea Xeral da ONU. Na súa ausencia, será a vicepresidenta primeira María Jesús Montero a encargada de presidir o Consello de Ministros.
As outras medidas que Sánchez anunciou como resposta ao xenocidio de Israel contra o pobo palestino abarcan desde a denegación de entrada no espazo aéreo a aeronaves que transporten material de Defensa con destino a Israel ata o reforzo do apoio que presta España á Autoridade Nacional Palestina (ANP).
