O aeroporto de Bruxelas prevé menos cancelacións o luns tras ciberataque

O aeroporto de Bruxelas seguirá rexistrando este luns alteracións como consecuencia do ciberataque sufrido o pasado venres, aínda que só se espera a cancelación de 40 voos con saída e outros 23 con chegada na capital belga.

As incidencias derivadas do ataque informático contra o provedor de servizos de facturación e embarque do aeroporto de Bruxelas, que tamén causou cancelacións e atrasos nos aeroportos de Heathrow en Londres e Berlín-Brandeburgo, obrigou a anular o domingo 44 voos con saída de Bruxelas e outros 28 con chegada, segundo a información proporcionada polo aeródromo.

O ciberataque forzou que as operacións de rexistro e embarque se deban realizar manualmente, provocando atrasos noutros voos a pesar de que o aeroporto despregou persoal adicional.

A portavoz do aeroporto de Zaventem-Bruxelas, Ihsane Chioua Lekhli, indicou á radiotelevisión pública RTBF que os rexistros seguirán facéndose este luns con papel e bolígrafo, pero tamén con computadores portátiles.

Ademais, os pasaxeiros poden facer o rexistro en liña e imprimir no aeroporto as etiquetas de identificación das maletas.

Na súa páxina web, o aeroporto recomenda aos viaxeiros comprobar por Internet o estado do seu voo e acudir ao aeródromo só se o traxecto está confirmado, con 2 horas de antelación para destinos dentro do espazo Schengen e 3 horas para voos fóra.

"O provedor de servizos traballa activamente no problema e esfórzase por resolvelo canto antes. Aínda non está claro cando quedará solucionado", agrega o aeroporto.

O ciberataque produciuse o venres ao serán, informou o aeroporto da capital belga, e afectou o provedor de servizos externos especializado no procesamento de datos no sector da aeronáutica Collins Aerospace, filial do grupo estadounidense de defensa RTX, anteriormente coñecido como Raytheon.

A comisaria europea de Emerxencias e Preparación de Crise, Hadja Lahbib, chamou á Unión Europea (UE) a investir en preparación ante as reais e complexas ameazas actuais, tras o ciberataque que desatou o caos en aeroportos en Bélxica, Reino Unido e Alemaña.

"O ciberataque de hoxe (polo sábado), que paralizou os aeroportos de toda Europa, demostra o reais e complexas que son as ameazas actuais. A nosa estratexia da Unión de Preparación reforza a coordinación e apoia os Estados membros. Debemos investir en preparación para garantir que estamos preparados para calquera eventualidade", dixo Lahbib a través dunha mensaxe en redes sociais.

O aeroporto de Berlín aínda rexistra atrasos de máis dunha hora 

O Aeroporto de Berlín-Brandeburgo Willy Brandt aínda rexistra atrasos de máis dunha hora este luns como consecuencia do ciberataque que comezou a afectar no serán do venres a esta e outras infraestruturas europeas.

"Hai considerables limitacións e atrasos agora mesmo porque hai moitos viaxeiros", dixeron a EFE fontes do aeroporto da capital alemá, que falaron de demoras de "máis dunha hora".

"Os atrasos varían de voo a voo", precisaron desde o aeroporto, que na súa páxina de Internet mantén a seguinte mensaxe: "Debido a un problema técnico nun provedor de servizos prodúcense longos tempos de espera. Por favor, utilice a facturación en liña, o autoservizo de facturación e a entrega rápida de maletas".

A maioría dos voos programados este luns presentan atrasos variables na páxina de Internet do aeroporto, onde non se observan cancelacións.

Tras un domingo no que os responsables do aeroporto berlinés deron conta dunha situación estabilizada, este luns facíase notar a afluencia de viaxeiros ao lugar tras o maratón de Berlín, que atraeu a decenas de miles de persoas de máis dun centenar de países.

"A situación informática non cambiou e os traballadores das aeroliñas fan a facturación manualmente, a pesar de "que as compañías puxeron en marcha alternativas e a que o check-in de autoservizo funciona sen atrasos", expuxeron as fontes do aeroporto.

O aeroporto de Berlín é unha das grandes infraestruturas aeroportuarias europeas que se viu afectada.